O‘zLiDeP Buxoro viloyat Kengashida o‘tkazilgan qo‘shma yig‘ilishda aholi bandligini ta’minlash va kambag‘allikni qisqartirish masalalari atroflicha muhokama qilindi. Hisobotga ko‘ra, o‘tgan yili 277,9 ming nafar fuqaro daromadli mehnat bilan ta’minlanib, ishsizlik darajasi 5,4 foizdan 3 foizga tushirildi. Bu ko‘rsatkichlar hududda iqtisodiy faollikni oshirish va aholi farovonligini yuksaltirish borasida amaliy natijalar bermoqda.

Kambag‘allikni qisqartirish yo‘nalishida ham sezilarli yutuqlarga erishildi. 2025 yil boshida 8,7 foizni tashkil etgan kambag‘allik darajasi yil yakuniga kelib 5,7 foizga qisqardi. 19 mingdan ortiq oila kambag‘allikdan chiqarilib, ularga doimiy ish, imtiyozli kredit, subsidiya va kasb-hunar o‘quvlari orqali barqaror daromad manbai yaratildi.

“Kambag‘allikdan farovonlik sari” dasturi doirasida 55 ta og‘ir mahallada infratuzilma yaxshilanib, sug‘orish va elektr ta’minoti tizimi modernizatsiya qilindi. Natijada minglab xonadonlarning tomorqa yerlaridan olinayotgan daromadi bir necha barobarga oshdi hamda 1100 dan ziyod yangi tadbirkorlik sub’yektlari tashkil etildi.

2026 yil uchun esa yanada katta marralar belgilangan. Xususan, 381,5 ming nafar aholini ish bilan ta’minlash, 12 mingdan ortiq kambag‘al oilalar daromadini oshirish va yil yakuniga qadar ishsizlik hamda kambag‘allik darajasini 2 foizga tushirish rejalashtirilgan. Deputatlar va partiya faollari ushbu vazifalar ijrosi ustidan qat’iy nazoratni ta’minlashga kelishib oldilar.